გიორგი სიხარულიძეს საპატიო ქუთაისელის სტატუსი მიენიჭა
მესხიშვილის თეატრში, ყოფილი სამხატვრო ხელმძღვანელის, გიორგი სიხარულიძის დაჯილდოვების ცერემონია გაიმართა.
ქუთაისის მერმა შოთა მურღულიამ გიორგი სიხარულიძეს, ქუთაისში 11 წლიანი, ნაყოფიერი მოღვაწეობისთვის, საპატიო ქუთაისელის წოდება მიანიჭა. თერჯოლის მუნიციპალიტეტის ინიციატივით, კი გიორგი სიხარულიძეს დავით და სერგო კლდიაშვილების შემოქმედების პოპულარიზაციისთვის დავით კლდიაშვილის მედალი გადაეცა
გიორგი სიხარულიძის ქუთაისში მოღვაწეობის დროს, 2007 წლიდან 2017 წლამდე მესხიშვილის თეატრში მოეწყო მცირე სცენა და ლიტერატურული სალონი, დასს 12 ახალგაზრდა მსახიობი შეემატა, დაიდგა 47 სპექტაკლი, ათეულობით ბენეფისი და იუბილე.
გიორგი სიხარულიძის რეჟისურით და ხელმძღვანელობით, გაკეთდა ქუთაისის მთავარი დღესასწაულის, ,,გვირილობის“ ახალი და მასშტაბური ფორმატი, რომელიც დღემდე ქალაქის სავიზიტო ბარათია.
შეგხსენებთ რომ მესხიშვილის თეატრის ყოფილი სამხატვრო ხელმძღვანელი გიორგი სიხარულიძე 2017 წლიდან, მიხეილ თუმანიშვილის სახელობის კინომსახიობთა თეატრის სამხატვრო ხელმძღვანელია.