डुवर्स नेपाली साहित्य विकास समितिको पुरस्कार अलङ्करण कार्यक्रम सम्पन्न...
0कालचिनी खण्ड अन्तर्गत हेमिल्टनगन्ज स्थित बून इङ्ग्लिस स्कूलको प्रेक्षागृहमा डुवर्स नेपाली साहित्य विकास समिति तथा सृजनशील समूहद्वारा पुरस्कार अलङ्करण तथा पुस्तक लोकार्पण समारोह कार्यक्रम सम्पन्न भयो । नेपाली समाजका विभिन्न विधाहरू जस्तै साहित्य, समाज, शिक्षा, संस्कृतिमा विशेष योगदान पुर्याउने व्यक्तिहरूलाई सम्मानित गरियो । कार्यक्रममा डु.ने.सा.वि.स.का अध्यक्ष कृष्णबहादुर श्रेष्ठ, मुख्य अतिथि असम गोर्खा सम्मेलनका अध्यक्ष कृष्ण भुजेल लगायत विशेष अतिथिहरूमा सञ्जीव दाहाल, रामकुमार राणा, पवन सिंह झा, दुर्गा चामलिङ, जेठा सुब्बा सादरी कवि रामकुमार राणा आदि रहेका थिए । कार्यक्रम अध्यक्ष, प्रमुख अतिथि साथैै विशिष्ट अतिथिहरूको बाहुलीबाट दीप प्रज्वलन गरि कार्यक्रमलाई शुभारम्भ गरियो । सृजनशील समूह कालचिनीका सदस्य श्याम प्रधानको स्वगत सम्भाषण अनि वाई एल टी पी समूहिक नृत्यको प्रस्तुति पश्चात डुनेसाविसका सचिव रबिन खवासले पुरस्कार अलङ्करणको सन्दर्भमा आफ्नो सम्भाषण राखे। कार्यक्रममा वरिष्ठ लेखक मननारायण प्रधानकृत ’साहित्यालोचन’ पुस्तकको विमोचन गरियो भने समोलोचक रूपेश शर्माले उक्त पुस्तक माथि निरुपण प्रस्तुत गरे । कार्यक्रमको मुख्य विषय पुरस्कार अलङ्करणमा श्री आशबहादुर लिम्बुलाई तिनको साहित्य योगदानका निम्ति चन्द्रबीर प्रधान स्मृति पुरस्कार, श्री जे बी छेत्रीलाई समाज सेवाका निम्ति हैकमसिंह राई स्मृति पुरस्कार, श्री अर्जुन कागतेलाई सङ्गीत तथा सांस्कृतिक सेवामा बी बी दर्नल स्मृति पुरस्कार तथा श्री बासु छेत्रीलाई शिक्षा सेवाका निम्ति किताबसिंह राई स्मृति पुरस्कार प्रदान गरियो । सम्पूर्ण पुरस्कार प्रापक व्यक्तित्वहरूलाई कम्रैले ढाका टोपी, खदा– दोसल्ला पहिराइ स्मृति चिन्ह तथा पुरस्कार नगद राशि प्रदान गरि सम्मान गरियो। कार्यक्रममा रुद्र छेत्री, ज्ञानलाल दर्नाल, रामकुमार राणा र अभिजित नागले क्रमैले नेपाली र सादरी भाषामा कविता कविता वाचन गरे । यसै कार्यक्रममा डु.ने.सा.वि.स.का नव आजीवन सदस्यता ग्रहण गर्ने सदस्यहरूलाई स्मृति चिन्ह प्रदान गरी सम्मान तथा स्वागत गरियो।