गोरूबथान अस्पताल विषयमा सीएमओएचसित बैठक, अबदेखि 7 दिनै 24 घण्टा चिकित्सक हुने - सीएमओएच,कालेबुङ
71गोरूबथान अस्पताल विषयमा सीएमओएचसित बैठक,
अबदेखि 7 दिनै 24 घण्टा चिकित्सक हुने - सीएमओएच,कालेबुङ
गोरूबथान अस्पतालमा 27 अगस्तको घटना 29 अगस्तको दिन पुन: दोहोरिएपछि आक्रोशित बनेका गोरूबथानवासीको दबावमा आएर शुक्रवार सीएमओएच, कालेबुङ गोरूबथान आएर बीडीओ, विभिन्न राजनीतिक दल, संघ-संस्थाका प्रतिनिधिहरूसित बैठक गरे। अस्पतालको कन्फरेन्स हलमा सम्पन्न संयुक्त बैठकमा शुरुमा घटनालाई सीएमओएचले हल्का प्रकारले लिएकोमा स्थानीय प्रतिनिधिहरू क्षुब्ध भए। स्वास्थ्य जस्तो विषयमा सीएमओएचको टालटुले रवैयादेखि रूष्ट बनेका राजनीतिक दल, संघ-संस्थाका प्रतिनिधिहरूले गर्मगर्मी बहस गर्न थाले। स्थिति प्रतिकूल देखेपछि मौखिक रूपमा आश्वासन दिने विषयमा अडिग बनेका सीएमओएच अन्तमा लिखित दिन बाध्य भए। बैठकमा सीएमओएचले गोरूबथान खण्ड प्राथमिक स्थास्थ्य केन्द्रमा भएको घटनाप्रति खेद प्रकट गर्दै अबदेखि 7 दिनै 24 घण्टा चिकित्सक हुने प्रतिनिधि टोलीलाई आश्वासन दिए। स्थानीय प्रतिनिधि टोलीले लिखित रूपमा माग्दा पहिला सीएमओएचले विभिन्न बाहाना गर्दै लिखित दिन अस्वीकार गरे। सीएमओएचको समर्थनमा अन्य चिकित्सकहरू पनि उभिए। सीएमओएचले घटनालाई हल्का लिएकोमा रूष्ट बनेका उपस्थित प्रतिनिधिहरूले आक्रोश व्यक्त गरे। प्रतिनिधिहरूको आक्रोश देखेर अन्तमा सीएमओएचले गोरूबथान खण्ड प्राथमिक स्वास्थ्य केन्द्रमा हप्तामा सात दिनै तथा 24 घण्टै चिकित्सक उपस्थित रहने भनेर लिखित रूपमा दिए। त्यसपछि मात्र स्थानीय प्रतिनिधिहरू साम्य बने। दुइ पल्ट गोरूबथान अस्पतालमा भएको घटना तथा त्यसमाथि हुन गइरहेको बैठकलाई ध्यानमा राखेर गोरूबथानका एसडीपीओ एम रहमानको अगुवाइमा पुलिस बल अस्पतालमा तैनाथ गरिएको थियो। यस अवसरमा सीएमओएचअघि स्थानीय मानिसहरूले बिक्षोप पनि व्यक्त गरे। स्मरण रहोस् 27 अगस्तको दिउँसो करिब साढें तीन बजेदेखि गोरूबथान अस्पताल चिकित्सकबिहीन भएको थियो। अस्पतालमा उपचाराधीन अवस्थामा 20 देखि 25 जना विरामीहरूलाई नर्सहरूको भरमा छोडेर चिकित्सकहरू बेपता भएपछि अबेर रातिसम्म गोरूबथान स्वास्थ्य केन्द्र तनावपूर्ण बनेको थियो। सोही राति 12 बजेतिर एकजना चिकित्सक आएरपछि घटना केही साम्य बनेको थियो तर हिजो राति पनि अस्पतालमा पुन: 27 अगस्तकै घटना दोहोरिएपछि अस्पताल दोस्रो चोटि तनावपूर्ण बन्यो। त्यसपछि स्थानीय मानिसहरूले बीडीओलाई घेराउ गर्दै तत्काल चिकित्सक उपलब्ध गराउऩुपर्ने माग गरे। त्यस समय गोरूबथान अस्पतालमा धेरै रोगीहरू एडमिड हुनको निम्ति आएका थिए। तर चिकित्सक नभएकोले एडमिड हुन नपाएको कारण तिनीहरूलाई बीडीओको निर्देश तथा व्यवस्थामा कतिलाई मालबजार अस्पताल अनि केहीलाई सिलगढी उपचारको निम्ति लगिने काम भयो। त्यसरी नै आज बिहान चिकित्सकहरू ड्युटीमा तैनाथ भएपछि गोरूबथान अस्पतालमा रहेका सबै विरामीहरूले डिस्चार्ज मागेर कति घर त कति उपचारको निम्ति अन्यत्र गएको जानकारी प्राप्त भएको छ। आज सम्पन्न संयुक्त बैठकमा सीएमओएच कालेबुङ डा. निरूपम विश्वास, डेपुटी सीएमओएच वान, कालेबुङ डा. सुदीप दास, बीएमओएच, पेदोङ डा. सत्यान हल्दार, बीएमओएच रम्बी डा. चन्दन कुमार छेत्री, डा. सुभाशिष मन्ना, डा. सुब्रतो मुखर्जी, बीडीओ गोरूबथान विश्वरंजन चक्रवर्ती, गोजमुमो जोनल एक सभापति अजय प्रधान, प्रचार-प्रसार सचिव ताबरज हैदर अली, तृणमूल कंग्रेस युवा नेतृत्व राज लामा, राजु घिमिरे, गोरूबथान ग्रासरुट फाउण्डेशनका सचिव ओमप्रकाश कार्की, प्रवेश राई, इन्टरनेशनल ह्युमन राइट्स काउन्सिल, कालेबुङ जिल्लाका अध्यक्ष अनुप राई, उपाध्यक्ष दिलीप गुरुङ, महिला अध्यक्ष सरिता सिन्हालगायत विभिन्न संघ-संस्थाका प्रतिनिधिहरूको सहभागिता रहेको थियो। गोरूबथान आएका इन्टरनेशनल ह्युमन राइट्स काउन्सिल, कालेबुङ जिल्लाका प्रतिनिधिहरूले गोरूबथान अस्पतालको निरीक्षण गर्नका साथै अस्पतालका चिकित्सक, कर्मचारीहरूसित कुराकानी गरेर यहाँ रहेका विविध समस्याबारे जानकारी लिए। प्रतिनिधि टोलीले एकत्रित गरेको जानकारी माथिल्लो स्तरमा सुपुर्द गरिने पनि प्रतिनिधि टोलीले जनाएको छ।
Camera/ Edit
Lenin Rai Kulung
8637816394/ 9733161396